يا شعبى يا حبيبى ؟؟

يا شعبى حبيى يا روحى يا بيبى ...... يا حطك فى جيبى يا بن الحلال
ياشعبى يا شاطر يا جابر الخواطر ...... .يا ساكن مقابر وصابر وعالم
يا واكل سمومك يا بايع هدومك ..... .يا حامل همومك وشايل جبال
يا شعبى اللى نايم وسارح وهايم ..... وفى الفقر عايم وحاله دا حال
احبك محشش مفرفش مطنش .......... ودايخ مدروخ واخر انسطال
احبك مكبر دماغك مخدر ................ ممشى امورك كده بأتكال
واحب اللى ينصب واحب اللى يكدب واحب اللى ينهب وسرق تلال



واحب اللى شايف وعارف وخايف........ وبالع لسانه وكاتم ما قال
واحب اللى قافل عيونه المغفل ............واحب البهايم واحب البغال
واحب اللى راضى واحب اللى فاضى....... واحب اللى عايز يربى العيال
واحب اللى يائس واحب اللى بائس ......واحب اللى محبط وشايف محال
واحبك تسافر وتبعد تهاجر ...... وتبعت فلوسك دولار او ريال
واحبك تطبل تهلل تهبل عشان ..... ماتش كوره وفيلم ومقال
واحبك تأيد تعضد تمجد ...... توافق تنافق وتلحس نعال
تحضر نشادر تجمع كور...تلمع تأمع تظبط مجال





لكن لو تفكر تخطط تقرر.......... تشغللى مخك وتفتح جدال
وتبدأ تشاكل وتعمل مشاكل ........وتنكش مسائل وتسال سؤال
وعايز تنور وعايز تطور ..........وتعمللى روحك مفرد رجال
ساعتها هاجيبك لا يمكن اسيبك ........وراح تبقى عبره وتصبح مثال
هابهدل جنابك واذل اللى جابك .....وهيكون عذابك دا فوق الاحتمال
وامرمط سعادتك واهزأ سياتك .......واخللى كرامتك فى حالة هزال
وتلبس قضيه وتصبح رزيه ........وباقى حياتك تعيش فى انعزال
هتقبل هاحبك ها ترفض هلبك .....هتطلع هاتنزل هاجبلك جمال؟